عمرو أديب:الى بيتعمل فى الزمالك دا حراااام وهؤلاء هم سبب الخسارة أمام الأهلى

1.6k

شارك

أبدى الإعلامى عمرو أديب استيائه الشديد عقب الهزيمة الثقيلة التى منى بها #الزمالك أمامه نظيره الأهلى بثلاثية نظيفة فى المباراة التى جمعتهما على استاد القاهرة فى ختام منافسات الدور الأول للدورى العام .

وقال أديب خلال برنامجه “كل يوم” المذاع عبر فضائية “ON E” : إنها نفس المباراة التى أشاهدها منذ 50 عامًا نفس المعلقين اللى أغلبهم أهلاوية ونفس التعليقات لكن ما أغضبنى الهزيمة 3/0 أو 6/1..#الزمالك لم يفز على الأهلى منذ 2007 .. حدث ثورتين ومليون حرب والإخوان مشيوا والدنيا اتغيرت وعملنا 100 كوبرى وتفريعة قناة السويس ومظاهرات إيران ولكن #الزمالك لم ينجح فى الفوز على الأهلى .

وأشار أديب : دى لعنة..أمى دعت عليا وقالت روحى يا ابنى يارب تبقى زمكاوى..أشياء كثيرة تغلبت عليها فى حياتى.. كنت تخين خسيت..إلا #الزمالك..هل فيه فريق فى الدنيا لديه الحظ المهبب ده.. لا تغيروا المدرب ولا العيبة..غيرونا احنا غيروا الجمهور لنستريح ..اللى بيتعمل فى #الزمالك دا حرام .. الظاهر الغريبة إنك كزملكاوى تتغلب ومتفتحش بوقك .

وتابع: المرار مش بيشربوا غير الزملكاوية .. دا حرام ومش عدل والواحد المفروض أنه يبل ريقه عشان يعرف إنه على حق لبعض الوقت.. بس على طول ضرب ضرب .. هو مفيش حاجة تانى؟ .

وواصل غاضبًا: تعبنا بقا فيه إيه!..أنا بجد مش فاهم النادى متبهدل وأكيد فيه سبب وفيه حاجة غلط.. إنه نادى غريب والعيب مش فى النادى ولا الإدارة ولا اللاعبين.. العيب فيا أنى مُصر ومتعذب..أنا إنسان محب للحياة وفى آخر حياتى ومركب دعامة .. خلاص مش ناقص كمان مجدى عبد الغنى يقتحم المحطة ويقول لى بعد الهدف الثالث لسه كمان دا اسمه تحرش متوجهًا بالتهنئة للاهلى على الأداء والنتيجة .

المصدر : الاهلي اليوم